[A:༤༦]མ་ལོན་པར་བསྟན་དགྲ་རྣམས་ལ་རྟགས་མཚན་མྱུར་དུ་བྱུང་བ་ཡིན་ནོ་ཞེས་ཐོས་ལ། དེ་ལྟར་སྟག་ཚང་རྫོང་ཁ་གཞན་ལག་ཏུ་འཆོར་བའི་རྒྱུ་ནི། སྔ་གོང་ཞིག་རྩེ་གདོང་བདག་ཆེན་པས་སྡེ་པ་ཐོབ་རྒྱལ་བ་ལ་དཔུང་ཁྱེར་ཁྲིད་གནང་བ་ཚབས་སུ་མ་སོང་བ་ལ་བརྟེན་ནས། བདག་ཆེན་རང་ཡང་བཙོན་ལམ་དུ་ཕེབས་དགོས་ཤར་ཞིང། དེ་མཐུན་སྟག་ཚང་རྫོང་དང་བཅས་པ་ཡང་མི་ལག་ཏུ་ཤོར་བ་ལ། རྩེ་གདོང་པ་རྣམས་ཀྱིས་ལན་ལོན་པ་ཞིག་མ་བྱུང་ཀྱང། སྔགས་འཆང་ཆོས་ཀྱི་རྒྱལ་པོ་ཉིད་ཀྱི་བཀའ་བཞིན་བསམ་ཡས་ཆོས་སྐྱོང་ཆེན་པོས། བདག་ཆེན་ཀུན་དགའ་བསམ་འགྲུབ་ཉིད་ལ་འཕྲིན་ལས་སྒྲུབ་པར་ཞལ་གྱིས་བཞེས་ཤིང་དམ་བཅའ་ཕུལ་བ་འདི་ཡང། གྲུབ་པའི་དབང་ཕྱུག་ཆེན་པོ་ཉིད་ལ་ཕྲིན་ལས་མགོན་པོ་སོགས་བསྟན་བསྲུང་དམ་ཅན་རྒྱ་མཚོས་བཀའ་བཞིན་སྒྲུབ་པའི་མཚན་མ་ཡང་དག་པར་རྟོགས་ཤིང། དེ་སྐབས་ཆོས་སྐྱོང་གི་སྤྲུལ་པས་དགྲ་བགེགས་ཚར་གཅོད་པའི་གཟིགས་སྣང་ངོ་མཚར་ཅན་བྱུང་བ་རྣམས་རི་མོར་མཛད་པ་ནི། ད་ལྟ་རྩེ་གདོང་སྲིད་གསུམ་རྣམ་རྒྱལ་གྱི་འདུ་ཁང་ཆེན་མོའི་སྒོ་ནང་ན་བཞུགས་པ་དེ་དག་ཡིན་པར་གྲགས། དེ་ལྟར་མཁས་གྲུབ་ཀྱི་སྒོ་ནས་བསྟན་འགྲོའི་དོན་རླབས་པོ་ཆེ་མཛད་དེ། དགུང་ལོ་ལྔ་བཅུ་རྩ་བརྒྱད་པ་ཆུ་ཕོ་སྤྲེལ་ལོ་སྦོ་ཟླ་བའི་ཉེར་དགུ་ལ་ཞིང་གཞན་དུ་གཤེགས།