[A:༡༤༣]མཚམས་སྔོན་འགྲོའི་སྟོད་ལས་རྡུལ་ཚོན་གྱི་དཀྱིལ་འཁོར་སྒྲུབ་གནང་གིས་དབྱངས་ཉིས་རྫོགས་སུམ་རྫོགས་ཀྱིས་གཏོར་བསྔོ་ཡན་ཆད། བདེ་མཆོག་སྒྲུབ་མཆོད་གྲོལ་ནས་ཁལ་ཁར་ཆོས་འཆད་ས་མ་རུབ་བར་དང༌། དེ་ནས་སྔ་འཕྲོས་བསྐང་གསོ་བཅས་སྲོད་ཆེན་ཟིན་ཙམ་ལ་གྲོལ་བར་མཛད་པ་སོགས། སོ་སྐྱེའི་བློ་ཡུལ་ལས་བརྒལ་བ་འཕགས་ཆེན་བྱང་ཆུབ་སེམས་དཔའི་བདག་བས་གཞན་གཅེས་ཀྱི་རྣམ་ཐར་ལྷུར་བཞེས་འདི་འདྲ་ནི་རྗེ་རྡོ་རྗེ་འཆང་དེ་ཉིད་ལ་སྔ་ཕྱི་རྣམ་པ་ཀུན་ཏུ་མང་དུ་མཆིས་ཀྱང་འདིས་མཚོན་པར་བྱའོ།།
ཉེར་གསུམ་ཉིན་ཕུར་བསྙེན་ལ་བཞུགས་གདན་འཇགས་རྒྱུའི་སྔ་དྲོ་དཀར་བདུད་ཀྱི་རྗེས་གནང་ཞིག་བསྩལ་ཏེ། ལྷ་མཆོག་རྡོ་རྗེ་གཞོན་ནུའི་བསྙེན་མཚམས་ལ་ཐུགས་གཞོལ་བའི་ཚེ་དཀར་བདུད་ཕུར་སྲུང་རྣམས་དགྱེས་པའི་རྣམ་འགྱུར་དུ་མ་དང་བཅས་ཞལ་ཡང་ཡང་བསྟན་པའི་རྐྱེན་གྱིས་བསྟོད་པ་རྒྱས་པ་འདིའང་དེ་དུས་མཛད་ཅིང༌། ཐོ་རེངས་ཀྱི་ཆ་འགའ་ཞིག་ཏུ་སྲུང་མ་དེ་དག་གིས་མཆོད་པ་ཁ་གསོ་བ་དང༌། མཆོད་མེད་སྤར་པར་རྗེ་ཉིད་བཞེངས་པར་བསྐུལ་བ་སོགས་བསྟན་སྲུང་མངོན་སུམ་དུ་བྲན་དུ་འཁོལ་བའི་ངོ་མཚར་མཛད་པས་དུས་འདའ་བའི་སྐབས་སོ།།
དགུང་གྲངས་ཉེར་གཉིས་སུ་ཕེབས་པ་ལྕགས་རྟ་ལོ་ཕུར་པའི་ལྗགས་བསྙེན་སྐབས་དབོ་ཟླའི་ཚེས་དགུའི་ཐོ་རེངས་འཇམ་མགོན་གནས་གསར་བ་ཆེན་པོ་ཉིད་ཟས་གཙང་སྲས་པོར་དངོས་སུ་གཟིགས་གྲོལ་འཕྲལ་ཆོས་སྡེ་ཉི་ཟླ་ཟུང་གིས་དགེ་འདུན་རགས་བསྡུས་རྣམས་ལ་བཀའ་ཆོས་ཀྱི་བང་མཛོད་