[A:༡༩༣]དྲུང་སྣ་ལྔའི་མཆོད་པ་འབུལ་གནང་དང༌། གཞན་ཡང་གསུང་གི་བདུད་རྩི་བཞེས་པ་རྣམས་བསྟན་འགྲོའི་ཆེད་སོ་སོའི་སྐལ་བ་དང་མཐུན་པར་སྤེལ་གནང་དང༌། རྗེ་བཙུན་ས་སྐྱ་པའི་བསྟན་པའི་རྩ་བ་འཁོན་རིགས་དྲི་མ་མེད་པའི་གདུང་རབས་སྤེལ་བར་བཀའ་བསྩལ་སོགས་ངལ་བ་ལྷུར་ལེན་གྱིས་དཔལ་ལྡན་བླ་མ་དམ་པའི་དགོངས་རྫོགས་སུ་སྟོབས་པ་དང༌། སྔོན་དུ་དགུང་གྲངས་ཉེར་གཉིས་ཐོག་གི་སྤྱན་ལྟས་ངོ་མཚར་ཅན་དེ་བཞིན་དང༌། དེ་ལོ་ཁྲུམས་ཟླའི་ཚེས་གསུམ་ཐོ་རེངས་གནས་གསར་རྡོ་རྗེ་འཆང་དཔོན་གཡོག་ཚང་མ་ས་སྐྱའི་བླ་བྲང་ཕུན་ཚོགས་གླིང་གི་དབང་ཁང་དུ་མཇལ་བར། ག་ཡ་དྷ་རའི་བུམ་ཆུའི་སྣོད་ལ་སྐྱོན་ཚུལ་དེ་ཞུ་གནང་ལ། སྐྱོན་མེད་འགྲོ་གསུངས་ཤིང༌། རྗེ་དེ་ལ་དགོངས་རྫོགས་འབུལ་རྟེན་ཡིན་དགོངས་པའི་ཁྱད་མཚར་གྱི་གོས་ཕོན་ཆེན་འབུལ་ཉམས་དང༌། ཞབས་གྲས་སྦྱིན་རྒྱམ་ཡིན་སྙམ་པ་ཞིག་གིས། ཡིག་བརྒྱ་མཚལ་དམ་མ་ཞིག་ཕུལ་ནས་རྗེ་བླ་མ་སྙུན་སྐབས་པད་དཀར་སྤྲུལ་སྐུའི་ལུང་བསྟན་དེ་འདི་ཡིན་ཟེར་བ་ཁ་ཕྱེད་ནས་གཟིགས་པ་ཚིགས་བཅད་ཁ་ཤས་བྱུང་བ་ཐུགས་དྲན་མི་གསལ་བའི་ཚུལ་མཛད། ཡང་སྐབས་ཤིག་གནས་དེར་གནས་གསར་རྡོ་རྗེ་འཆང་ཉིད་བཞུགས་ཏེ་མཎྜལ་ཚོམ་བུ་དུ་མ་ཞིག་གི་མཐར་མཆོད་གཏོར་བཤམས་ནས་ཕུར་པའི་དབང་སྔར་གསན་མ་མྱོང་བ་ཞིག་བསྩལ་བ་དང༌། གཞན་ཡང་རྣམ་འདྲེན་དེ་ཡང་ཡང་ཕེབས་ཏེ་རྗེ་བཙུན་ས་སྐྱ་པའི་ཟབ་ཆོས་ཁ་ཤས་ལ་བསྐྱར་ཆོས་མཛད་པ་དང༌། སྐུའི་རྣམ་འགྱུར་ཞི་ཁྲོ་དུ་མའི་སྒོ་ནས་ལུགས་གཉིས་ཀྱི་བླང་དོར་