[A:༢༢༨]འཆང་ཉིད་ཐུགས་སྤྲོ་བའི་ངང་ནས་སྒོ་རུམ་ནང་སོ་སོགས་སུ་ཕེབས་ཏེ། སྔར་སྐུ་བལྟམས་དུས་གཏང་རག་ལ་ཕུལ་བའི་ལྷ་མདུང་ལ་དར་ཡུག་རིང་མོ་རེ་གསོལ་བར་མཛད་ནས་སྐྱེད་ལྷས་བསམ་བརླིང་གཉིས་ལ་གཏོར་སྤོད་གྲས་སུ་ཕྱག་ལེགས་པར་ཕེབས་སོ། །མགོ་ཟླའི་ཚེས་དྲུག་གི་ཐོ་རེངས་འོད་གསལ་དུ། སི་ཏུ་གྲོངས་པའི་རྐྱེན་བྱས་ཏེ་སྡེ་དགེ་བློ་གྲོས་རྒྱལ་མཚན་ཉིད་ཤིན་ཏུ་མྱ་ངན་ཆེ་ཉམས་ཀྱིས་ནང་མུན་ནེ་བ་ཞིག་གི་ཀ་དྲུང་ན་ཞལ་བྱང་གཟིགས་སུ་བཞུགས་ཏེ། སི་ཏུས་བཀའ་འགྱུར་རིན་པོ་ཆེ་ཞུ་དག་མཛད་པ་སོགས་སྡེ་དགེར་སྐུ་དྲིན་ཆེ་ཚུལ་དུ་མ་གསུངས་ཤིང༌། རྟ་རྐྱང་པའང་བརྒྱད་ཅུ་ཙམ་བྱིན་པ་ཡིན་གསུངས་པ་ཞིག་འཁྲུངས་སོ།།
དགུང་གྲངས་སོ་བདུན་དུ་ཕེབས་པ་ཤིང་བྱ་རྟ་ཟླའི་ཚེས་གཅིག་ནས་རྣམ་སྲས་བསྐང་བ་ཟླ་གང་མ་མཛད། དབོ་ཟླ་ནས་མཁན་ཆེན་ཚོས་བཀྲ་ཤིས་སོགས་ལ་ས་སྐྱ་བཀའ་འབུམ་གྱི་ལྗགས་ལུང་ཡང་ཚུགས་ཤིང༌། རྒྱལ་ཡུམ་ཞབས་འབམ་གྱིས་སྙུན་པར་སྨན་ཆབ་ལ་ཕེབས་པས་ངོ་ཇེ་གསལ་དུ་སོང་ནས་བཅོས་རྣམས་མཛད་མུར། ཞལ་དྲོའི་འཇིམ་སྐུ་རྣམས་བཞེངས་ཟིན་ནས་རབ་གནས་བརྒྱ་ཚར་ཚུགས་དུས་སྔ་དྲོ་ཞིག་ས་སྐྱའི་ནུབ་ཕྱོགས་སུ་འཇའ་ཚོན་ཡ་མཚན་ཅན་ཞིག་ཤར་བས་རབ་གནས་ལ་དགེ་ལྟས་སུ་གཟིགས། དེ་ནས་སྡེ་དགེ་སྨན་བླ་དཀོན་མཆོག་གྲགས་པ་སོགས་ལ་དབང་བཀའ་རྗེས་གནང་འཐོན་ཕྱག་སོགས་རིམ་བཞིན་གནང་ནས། སྣྲོན་ཟླའི་ནང་མཛོད་འཛིན་དབུས་ཕེབས་ཤིག་དང་བསྟུན་ཤབ་ཆུ་རགས་ལ་ཟློས་སྐོར་གྱི་འགོ་ཟུག་