[A:༢༧༢]རྗེ་རྡོ་རྗེ་འཆང་ཉིད་ཀྱི་སྐུ་འཕྲང་འཚུབ་མ་ཞི་བའི་རྟགས་སུ་གོར་མ་ཆག་གོ །དེ་ལྟའི་སྐབས་རྒྱལ་ཁམས་སུ་རྗེ་ཉིད་ཀྱི་ལྗགས་ཆུ་རིམས་སྲུང་སོགས་ཀྱིས་ཕལ་ཆེར་ཁྱབ་ཅིང༌། གོང་གསལ་གྱི་ཐུགས་བསྐྱེད་དེ་དག་བཅས་ཉིད་ཀྱི་སྐུ་དྲིན་གྱིས་བསྐྱངས་སོ་ཞེས་པའི་སྒྲ་སྒྲོགས་པས་བྲེལ་བ་བཞིན་དོན་ལའང་གནས་སོ། །ས་ཟླའི་མཇུག་ཐས་སེ་ཏཱ་ལ་སྦོ་ཤོག་ཐུའི་གསུང་མངགས་ཞིབ་ཆ་བཅས། བླ་མ་སངས་རྒྱས་དོན་གྲུབ་དཔོན་གཡོག་འབྱོར་བ་རྗེ་ཉིད་རིལ་སྒྲུབ་བཅད་རྒྱ་འགྲིག་པས་ཞག་འགའ་སྒུག་ཐོག་ནས། རྟེན་འབྲེལ་རབ་ལ་སྒྲིག་མི་དགོས་པར་འགྲིག་པ་ནི། སྣྲོན་ཟླའི་ཚེས་གཉིས་ལ་འཇམ་མགོན་ཁམས་གསུམ་དབང་སྡུད་ཉིད་ཀྱཻ་རྡོ་རྗེའི་རྒྱུད་འདོན་ལ་ཐོག་མར་ཕེབས་དུས་བླ་མ་དཔོན་གཡོག་ལ་འབྱོར་ཕྱག་ཐོག་ཁོང་ཚོས་མགུལ་ལ་བཀྲ་ཤིས་པའི་ལྷ་དར་ཕུལ་བ་དང༌། ཚེས་གསུམ་ཉིན་སྤྲུལ་པའི་ལྷ་ཁང་ཆེན་མོར་ཟབ་པའི་ཡང་རྩེ་བླ་མའི་རྣལ་འབྱོར་ཉམས་བཞེས་པ་མདོ་སྔགས་ཚོགས་ཡོངས་ཀྱི་དབུར་རྗེ་ཡབ་སྲས་བྱོན་ཐོག དམ་ཚིག་འགྱུར་མེད་བས་སེ་ཕྱག་རྡོར་སྐྱབས་ཀྱི་གསུང་ཤོག་རྟེན་གྱ་ནོམ་པས་ཐོག་དྲངས། མཎྜལ་གྱིས་གཙོས་དངུལ་བྲེ་ཆེན་མང་པོའི་འབུལ་ཆེན་མཛད་པ་སོགས་དགེ་ལེགས་རྟེན་འབྲེལ་བཟང་པོ་རབ་འབྱམས་རྒྱལ་བའི་ཞིང་ཁམས་སུའང་ཁྱབ་ཅིང་གྲུབ་པར་གྱུར་ཏོ། །དེ་ནང་ཆུ་སྟོད་དགེ་ཚ་དང༌། བཅོ་ལྔར་ཞལ་དྲོ་ལྷ་ཁང་དུ་རྗེ་ཉིད་ཀྱིས་དེབ་སྒྲིགས་བཞིན་བསྟན་དོན་རྒྱ་ཆེར་མཛད་པ་ནི་རྣམ་པ་ཀུན་ཏུའོ། །གྲོ་བཞིན་ཕུར་སྒྲུབ་ཉེར་གཅིག་མུས་ཆེན་མཆོད་བསྔོར་དཔལ་འཁོར་ལོ་བདེ་མཆོག་གི་རྣམ་སྤྲུལ་ཡིན་པའི་བསྔགས་