[A:༢༥]མཆོག་དྲུང་ལ་གཏན་ནས་མ་བྱོན་པས་ཕྱིས་ཀྱི་རྟེན་འབྲེལ་ཡང་དེ་ལྟར་དུ་གྱུར་ཅིང༌། དེ་དུས་ཚེ་དཔག་མེད་ལྷ་དགུའི་སྒོ་ནས་འཆི་བླུ་དང་རྗེས་འབྲེལ་གྱི་བཀའ་དབང་ཐོག་མེ་ཏོག་དཀྱིལ་འཁོར་ལ་འབུལ་སྐབས་ཀྱང་ཡབ་རྗེའི་དེ་སངས་རྒྱས་ཚེ་དཔག་མེད་ལ་བབས། རྗེ་རྡོ་རྗེ་འཆང་ཉིད་ཀྱི་དེ་རིན་ཆེན་ཚེ་དཔག་མེད་ལ་བབས། འཇམ་མགོན་གཅུང་དམ་པ་དང་ཡུམ་མཆོག་དྲུང་གི་དེ་གཞལ་ཡས་ཁང་ནང་དུ་ལྷུང་ཙམ་བྱུང༌། གུར་ཁྲོ་བཅུ་དང་ཞལ་བསྙེན་དུས་ཀྱི་རྗེས་གནང་ཡང་གསན། ཡང་ཐར་རྩེ་རྡོ་རྗེ་འཆང་ཉིད་ནས་ཡབ་རྗེར་སྒྲོལ་དཀར། རྗེ་ཉིད་ལ་དབྱངས་ཅན་ལྷ་མོ། གཅུང་དམ་པར་ཞལ་སྒྲུབ་དུས་ཀྱི་ཐང་ག་བཅས་བསྩལ་བའང་བརྟགས་ཤིང་དཔྱད་ན། ཡབ་རྗེ་མཆོག་ལ་སྐུ་ཚེ་བསྲིང་ཐབས་སྒོ་གང་ཟབ་མཛད་དགོས་པ་དང༌། རྗེ་རྡོ་རྗེ་འཆང་ཉིད་ཤེས་བྱའི་དཀྱིལ་འཁོར་ལ་སྒྲ་དབྱངས་ལྷ་མོ་ལྟ་བུའི་མཁྱེན་རབ་རྒྱས་པར་འགྱུར་བ་དང༌། གཅུང་དམ་པ་ཉིད་ལ་གཉན་མགོན་ཞལ་བཞི་པ་ཤིན་ཏུ་འགོ་ཞིང་འཆེས་པས་ན། དེ་ཉིད་བསྟན་སྒྲུབ་ཀྱིས་ཕྲིན་འཆོལ་དགོས་པའི་བརྡ་ཡང་དག་པ་རྣམས་རྩ་བའི་བླ་མ་དམ་པ་གང་ནས་ལྐོག་གྱུར་རྗེན་སྟོན་དུ་གོར་མ་ཆག་གོ །
དགུང་གྲངས་བཅུ་པ་ས་རྟར་དབང་ཁང་ཕུའི་མགོན་ཁང་སྲིད་གསུམ་ཟིལ་གནོན་དུ་ལྷ་མཆོག་རྡོ་རྗེ་གཞོན་ནུའི་གྲངས་ཀྱི་ལྗགས་བསྙེན་ཁ་སྐོང་སྦྱིན་སྲེག་བཅས་མཐར་ཕྱིན་དུ་བཀའ་དྲིན་ཆེ་ཞིང༌། ཐུན་བར་ལ་ཡབ་རྗེ་མཆོག་ནས་ས་སྐྱ་བཀའ་འབུམ་གྱི་ལྗགས་ལུང་དང༌། དེ་ལོ་སྒྲོལ་མ་གཡུ་