[A:༣༧༥]དེ་ཚུགས་པར་མཛད་པའི་སྤྱན་འདྲེན་དང་བསྟུན། ཁའུ་ཕྱོགས་ནས་ཁ་བ་བུ་ཡུག་འཚུབ་པ་སོགས་ལྷ་འགོ་བའི་རྟགས་དང་བཅས། གསུང་བསྐང་ཡོངས་རྫོགས་ཉིན་ཁོངས་སུ་གྲུབ་པར་མཛད། དེ་དུས་ཡུམ་ཡང་སྙུན་གཞི་ལས་གྲོལ་བས། ཡབ་ཡུམ་ཞལ་རྒྱས་ཏེ་དམར་པོ་སྐོར་གསུམ་གྱི་སྐུ་པར་འདེབས་གནང་དང་། ཚེས་དགུ་དང་བཅུར་ཡང་ཚོགས་བདག་བསྐང་གསོ་གནང་མུའི་དགུའི་སྲོད་འཁོར་ཙམ་ནས་བཟུང་། ཁ་བ་ཅུང་ཟད་འབབ་མུར་སྐུ་གདུང་རིན་པོ་ཆེ་བལྟམས་རན་པས། རྗེ་རྡོ་རྗེ་འཛིན་ཉིད་ཐུགས་ལྷག་པར་སྤྲོ་བའི་ངང་ནས་རྒྱལ་ཚིང་སོགས་དེ་སྐབས་ཀྱི་ཞབས་ཕྱི་རྣམས་ལ་བསྲུང་འཁོར། སྲིད་པ་ཧོའི་ཙཀླི་བཅས་འདོགས་པར་མཛད་པ་དང་། གང་ལ་གང་དགོས་སྔགས་དང་རྩིས་སྨན་ནས་བཤད་པའི་ཉེར་མཁོ་མཐའ་དག་འདུ་མཛད་ཅིང་། ཡུམ་ལའང་གང་ཅིའི་བཀའ་འདོམས་ལྷུས་འཐིང་ཞིབ་ལྷུག་སྩོལ་རྗེས། རྩ་བའི་བླ་མ་དམ་པ་དང་དབྱེར་མེད་རྗེ་བཙུན་རིན་པོ་ཆེ་གྲགས་པ་རྒྱལ་མཚན་དང་། སངས་རྒྱས་སྨན་བླ། རྗེ་བཙུན་སྒྲོལ་མ་རྣམས་ལ་ཐུགས་སྨོན་གསོལ་འདེབས་རྩེ་གཅིག་ཏུ་མཛད་ཀྱིན་བཞུགས་པས། དེ་ཡང་རབ་བྱུང་བཅུ་གསུམ་པའི་ནང་ཚན་ཉི་མ་ཞེས་པ་ཆུ་མོ་ལུག་གི་ལོ། བདག་ཅག་གི་སྟོན་པ་ལོངས་སྤྱོད་རྫོགས་པའི་སྐུར་བཞེངས་ཏེ། དཔལ་ལྡན་འབྲས་སྤུངས་སུ་ཆོས་རྒྱལ་ཟླ་བ་སོགས་ལ་ཁྱབ་བདག་དུས་ཀྱི་འཁོར་ལོའི་རྩ་བའི་རྒྱུད་གསུངས་པའི་དུས་ཆེན་དང་ཉེ་བར་ནག་ཟླའི་དཀར་པོའི་ཕྱོགས་ཀྱི་ཚེས་དགུའི་སྲོད་ཡོལ་ཙམ་ལ་སྔར་གྱི་ཁ་བ་ཆར་དུ་གྱུར་ནས་ཆེས་ཆེར་ཉིལ་