[A:༣༨༤]འབྱུང་བ་དང་། གཞུང་བརྒྱ་འཆད་པའི་ལྕེ་བདེ་བློ་གསལ་ཞིང་། །སོགས་ནས་ཡོངས་རྫོགས་བསྟན་པའི་བདག་པོར་འགྱུར་བར་ཤོག །ཅེས་ས་ལོ་ཆེན་པོའི་རྣམ་ཐར་དཀོན་མཆོག་ལྷུན་གྲུབ་ཀྱིས་མཛད་པ་ནས་འབྱུང་བ་དེ་སྨོན་ལམ་དུ་བསྒྱུར་གནང་དང་། ཐུབ་པའི་བསྟན་པ་རིན་ཆེན་གཞལ་མེད་ཁང་། །ཞེས་སོགས་ནས། བསྟན་བཅོས་ཉི་མའི་སྣང་བ་རྒྱས་བྱེད་ཤོག །ཅེས་སྡོམ་གསུམ་རབ་དབྱེའི་གཤམ་ནས་འབྱུང་བ་དེ་སྨོན་ལམ་དུ་བསྒྱུར་གནང་སོགས་མཁས་པའི་མཛད་པ་འགྲུབ་པའི་ཐུགས་སྨོན་རྣམས་འབྲས་དཀར་གྱི་ཆར་ཉིལ་བཞིན་དུ་མཛད་རྗེས། གླེགས་ཤིང་ལ་གསེར་བྲིས་ཀྱི་ཀ་མད་སུམ་ཅུ་ནས་འབུལ་བར་མཛད་པས། ཀ་ཡི་གི་གུ། ཞབས་ཀྱུ། འགྲེང་བུ། ན་རོ་རྣམས་ཕུལ་བས་ཨ་ཡིག་བར་ལ་རིགས་འགྲེ་ནུས་ཏེ་མཁྱེན་པ་དང་། གསུང་སློབ་རྣམས་ཀྱང་ལན་གཉིས་གསུམ་ལ་མཁྱེན་པ་སོགས། འཇམ་མགོན་བླ་མས། སྐྱེ་བ་གཞན་དུ་སྦྱངས་པ་དང་། །མཁས་པ་དུ་མ་བསྟེན་པ་དང་། །རྣམ་པར་དཔྱོད་པའི་བློ་གྲོས་ཀྱི། །ཤེས་བྱ་ཀུན་ལ་འཇིགས་མེད་ཐོབ། །ཅེས་གསུངས་པ་ལྟར། ཡབ་རྗེ་ཆོས་ཀྱི་རྒྱལ་པོ་ཉིད་ཐུགས་དགྱེས་པའི་རྩེར་སོན། དེ་ནས་ནང་སོའི་རབ་སྟོན་སྐབས་ཀྱི་ཡོན་སྒོར་འཇམ་མགོན་གཞོན་ནུ་སྐུ་མཆེད་ཞལ་ངོ་རྣམས་དང་ཕྱག་གཉེར་བཅས་ཕེབས་པར་དེའི་ཚེ་འཇམ་མགོན་གཞོན་ནུའི་ཕྱག་ཏུ། རྗེ་རྡོ་རྗེ་འཆང་ཉིད་ཀྱི་ཐུགས་བསྐྱེད་ཀྱིས་བསྐྲུན་པའི་ས་ལེ་སྦྲམ་གྱི་ཁམས་ལས་གྲུབ་པའི་བུམ་པ་ཆ། ཕུད་དམ། ཕུད་ཕོར། འདྲེན་ཆས་ཆ་ཚང་གསུམ་སོགས་གསེར་སྤྱད་མང་དུ་མཆིས་པའི་ནང་ནས་གསེར་གྱི་ཕུད་