[B:6a]རྒྱལ་བའི་བསྟན་པ་ནི། །ཉིས་སྟོང་སུམ་བརྒྱ་ཞེ་གསུམ་འདས། །ཉིས་སྟོང་དྲུག་བརྒྱ་ང་བདུན་ལུས། དེས་ན་དིང་སང་ལྔ་བརྒྱ་པ༑ །ལྔ་པའི་སྐེད་ཡིན་འཐད་ལྡན་ནོ། །ཡོངས་གྲགས་ལྟར་ན་སུམ་སྟོང་དང་། དྲུག་བརྒྱ་གཅིག་འདས་སྟོང་དང་ནི། །བཞི་བརྒྱར་གཅིག་ཆད་ལུས་པས་ན། །ལྔ་བརྒྱ་བརྒྱད་པའི་སྟེང་དུ་སླེབས། །གང་འཐད་གོང་བཞིན་དཔྱད་པས་ཤེས། །དེ་ལྟར་ན༑ བོད་ཁ་བ་ཅན་གྱི་ལྗོངས་འདིར། རིགས་གསུམ་མགོན་པོའི་རྣམ་འཕྲུལ་ཆོས་རྒྱལ་བྱང་ཆུབ་སེམས་དཔའ་ཡོན་མཆོད་ཐུགས་རྗེ་ལས་སྤྲུལ་པ་རྣམས་ཀྱིས་རྒྱལ་བའི་བསྟན་པ་སྔར་མེད་གསར་དུ་བཙུགས། གཙང་གཡོ་དམར་གསུམ་བླ་ཆེན་མཁན་བརྒྱུད་རྣམས་ཀྱིས་སྔར་ཡོད་ཉམས་པ་གསོས། ལྷ་བཙུན་ཁུ་དབོན། ཇོ་བོ་ཡབ་སྲས། འབྲོག་འགོས་མར་གསུམ། པ་ཚབ་རྔོག་ཁྱུང་། ར་འབྲོ་ལ་སོགས་པས་ཤིན་ཏུ་དར་བར་མཛད་མོད་ཀྱི། ཕལ་ཆེར་མདོ་དང་སྔགས་ཀྱི་ཕྱོགས་རེ་བ་ཙམ་དུ་ཟད་ལ༑ དུས་ཕྱིས། རྒྱལ་བ་ཐམས་ཅད་ཀྱི་ཡེ་ཤེས་གཅིག་ཏུ་བསྡུས་པ། རྗེ་བཙུན་འཇམ་པའི་དབྱངས་ཉིད། འཁོན་གྱི་གདུང་བརྒྱུད་ཀྱི་ཚུལ་བཟུང་ནས། ཕྱི་ནང་མདོ་སྔགས་བཤད་གྲུབ་ཀྱི་བསྟན་པ་མཐའ་དག་འཛིན་སྐྱོང་སྤེལ་གསུམ་གྱི་སྒོ་ནས་ཆེས་
[A:12]ཤིན་ཏུ་དར་ཞིང་རྒྱས་པར་མཛད། ཤར་ཕྱོགས་རྒྱ་མཚོའི་མཐས་གཏུགས་པའི་འཛམ་གླིང་བྱང་ཕྱོགས་ཀྱི་སྐྱེ་རྒུ་ཐམས་ཅད་ཆོས་དང་ཟང་ཟིང་གི་དཔལ་འབྱོར་བཟང་པོས་ལེགས་པར་བསྐྱངས་པ་ནི་ངོ་མཚར་ཞིང་བཀའ་དྲིན་ཤིན་ཏུ་ཆེ་བས། གདུང་བརྒྱུད་རིན་པོ་ཆེའི་བྱོན་ཚུལ་དང་། རྣམ་པར་ཐར་པ་འཆད་པ་དང་ཉན་པ་ལ་འབད་པར་རིགས་སོ། །དེ་ལ་འདིའི་རིགས་ནི་བོད་དུ་བྲམ་ཟེའི་རིགས་སུ་གསལ་བ་མ་བྱུང་བས། རྒྱལ་རིགས། རྗེ་རིགས། དམངས་རིགས་གསུམ་ལས། ཞང་བློན་རྗེའུ་རིགས་ཡིན་ཏེ། མིའི་གདུང་རབས་