[A:182]
ལེགས་བཤད་ཇི་བཞིན་བྲིས་པ་ཐ་དད་དོ། །
བསྟུངས་པ་མེད་པར་གཟུགས་སུ་ལེགས་གྲུབ་ནས། །
ཕྱིས་པ་མེད་པར་དྲི་མ་རབ་དག་སྟེ། །
ཕྱིན་པ་མེད་པར་ལྐོག་ཏུ་གྱུར་པའི་དོན། །
འཁྲུལ་པ་མེད་པར་རྒྱ་བོད་གསལ་བར་སྣང་། །
དེ་ཕྱིར་འདི་ནི་ཀིམ་ཤིང་ཀོང་ཇོ་ཡི། །
སྣང་སྲིད་གསལ་བའི་མེ་ལོང་དེ་དང་མཚུངས། །
རྒྱལ་སྲས་མཛད་པ་སྟོན་པ་ཆེས་འཕགས་ལ། །
གཟུགས་དང་དོན་གྱི་དབྱེ་བ་ཐ་དད་དོ། །
ལེགས་བཤད་འདི་ནི་སྤྱི་དོན་དགོས་འབྲེལ་དང། །
མདོར་བསྟན་རྒྱས་བཤད་ཚུལ་གྱིས་འཆད་འདོད་ཀྱང་། །
ལོ་རྒྱུས་ཁུངས་སྟོན་ཙམ་ཞིག་སྨོས་པ་ནི། །
བདག་བློ་ཐོས་པ་དམན་པས་རབ་ཞུམ་ལ། །
ཐོས་ལྡན་འགའ་ཞིག་ཏོག་གིས་རབ་མྱོས་ཀྱང་། །
ཇི་བཞིན་སྨྲ་བའི་རྣམ་དཔྱོད་ཀྱིས་སྐོམ་པ། །
གལ་ཏེ་སྲིད་ན་ཕྲག་དོག་བྱིན་ཟ་ཡིས། །
ཡི་རང་སྲེགས་ཀྱིས་དགོས་པའང་ཡིན་ནམ་སྙམ། །
བསྟན་འཛིན་ཡོན་ཏན་རབ་དཀར་གངས་རི་ལས། །
བདག་བློ་གུས་པའི་གདུང་ཤུགས་ཀྱིས་དྲངས་པའི། །
ངོ་མཚར་ལེགས་བཤད་བསིལ་བའི་ཆུ་རྒྱུན་འདི། །