[A:42]'byung ba bzhin du glang po che'i rnam pas/ yum gso sbyong la gnas pa'i glo g.yas pa nas lhums su zhugs te/ glang chen thal dkar mche ba drug ldan pa/ / rkang bzhi mdzes dang ldan par zhal bzhes nas/ /drang srong gnas shes pa ni ji bzhin du/ /yum gyi lhums su bde bar zhugs par gyur/ /zhes so/ /de'i tshe rgyal po'i khab tu dge ltas brgyad byung ste/ khang pa dga' dang bya mang 'byung / / shing dang me tog kha bye zhing / /longs spyod 'phel zhing sgra rnams 'khrol/ /gter rnams kha bye 'od gsal ba'o/ /de nas yum gyis rgyal po la gsol ba/ gser gyi drwa bas rgyab g.yogs spyi gtsug dmar/ /thal dkar mche ba drug dang rab ldan zhing / /dung dang kha ba dngul mdog lta bu yi/ /glang po'i mchog cig khong du song snyam bgyid/ /de zhugs nas ni bdag gi lus dang sems/ /sngon chad mthong thos myong bar ma gyur pa'i/ /bsam gtan mnyam par bzhag par bzhin du gyur/ /zhes pa dang / rgyal pos dge ba'i tshogs chen po yang byas so/ /de nas yum gyi lhums su byang chub sems dpa' nye bar spyad pa tsan dan sbrul gyi snying po las byas pa'i rin po che bkod pa zhes bya ba'i gzhal yas khang du byin gyis brlabs te/ der zla ba bcu zhig zag med kyi bde ba la longs spyod cing lha dang mi'i skye rgu phrag khrig phrag sum cu rtsa drug smin par byas so// //
! gsum pa bltams pa ni de nas zla ba bcu 'das te btsa' ba'i dus la babs pa dang / zas gtsang ma'i skyed mos tshal du me tog rnams kha 'bus pa dang | gter chen po nyi khri kha 'bus pa dang / rin po che la myu gu skyes pa dang / sgra snyan pa rang 'khrol ba la sogs pa snga ltas sum cu rtsa gnyis byung ngo / /de'i tshe