[A:51]khang bzang du bcug nas/ phyogs rnams shAkya lnga brgyas bsrungs pa dang / de'i nam mkha' la lha rnams kyis/ da ste zhag bdun na byang chub sems dpa' grong khyer gyi phyir ma gshegs na 'khor los bsgyur ba'i rgyal por 'gyur la/ gal te gshegs na sangs rgya'o zhes nub re bzhin sgrogs so/ /de nas zhag bdun 'das pa'i mtshan mo nam phyed na/ sum cu rtsa gsum gyi lha rnams kyis mi rnams gnyid mthug po la bkod pa dang / byang chub sems dpas yab la/ lha gcig bdag ni mngon par byung ba'i dus bab rig /gegs kyang mi mdzad mi dgyes par yang ma mdzad cig /rgyal po gnyen bcas yul 'khor bcas te glod par mdzod| |ces zhus pas/ yab kyis gzhon nu de skad ma smra zhig khyod ci 'dod pa sbyin no/ /zhes pa las/ bdag ni skye rga na 'chi med par 'tshal lo zhes gsungs pas|'di ni nges par mngon par 'byung ngo snyam nas/ phan byed 'gro na thar byed rjes su yi rang ba'o/ khyod kyi bsam pa rnams ni yongs su rdzogs gyur cig /zhes gnang ba byin no/ /de nam phyed kyi skar ma rgyal mngon du gyur pa na khang pa'i steng du byon te/ phyogs bcu'i sangs rgyas rnams la phyag 'tshal nas gsol ba btab ste/ nga yi bkra shis don kun grub 'di ni/ /don nub gdon mi za bar 'grub 'gyur gyis/ /'dun pa phyi shol ma byed la gor du/ /rta rgyal rgyan gyis brgyan pa nga la byin/ /zhes gsungs pa dang / 'dun pas khyod ni dus tshod mkhyen pa lags na ci'i slad du bka' bstsal/ zhes pa la/ 'dren pa nga ni gzhan don 'tshal ba na/ /byang chub rga shi med pa'i don thob nas/ /'gro ba bsgral bar bya zhes yun ring nas/ /smon lam btab pa de yi dus la babs/ /zhes gsungs