[A:52]nas bsngags ldan chibs te rgyal po chen po bzhis rta'i rmig pa bzhi las bteg nas| brgya byin dang tshangs pas lam brgyan te/ lha dang klu dang gnod sbyin dang dri za la sogs pas mchod pa byed cing / nam mkha' la gshegs te dpag tshad drug gi pha rol mchod rten rnam dag gi drung du phyin pa dang / drang srong chen po dge ba stong dag spyad pa dang / /nam phyed nas ni dpag tshad drug tu song gyur nas/ / 'dun pa de la rta mchog dang ni rgyan rnams gtad/ /'dun pa 'di dag khyer la ser skya'i grong song zhig /yab dang yum dag la yang nga yi tshig gis ni/ /gzhon nu song gi slar yang thugs ngan ma mdzad cig /byang chub sangs rgyas nas ni slar 'dir mchi bar byed/ /chos rnams gsan nas thugs kyang zhi bar 'gyur/ /zhes smros shig ces pas rta dang na bza' dang rgyan rnams 'dun pa la gtad de/ rga shi med pa'i gnas mchog 'chi med pa/ /byang chub dam pa nga yis ma thob bar/ /nga ni ser skya'i grong khyer mngon phyogs dor/ /'greng 'dug nyal dang 'chag par mi bya'o||zhes gsungs pa dang / 'dun pas bdag la chad pas gcod du mchi'o/ / zhes pa la/ nga la byams pa bzhin du khyod la byams par 'gyur gyis gsungs pa dang | 'dun pas der mchod rten brtsigs pas 'dun pa phyir log gi mchod rten zhes grags so/ /de nas byang chub sems dpa' ral gri shubs nas phyung ste nyid kyi dbu skra bzhar ba sum cu rtsa gsum gyi lha rnams kyis gser gyi gzhong par blangs te/ mchod rten byas nas dus rgyun du mchod pa byed do/ /gtsug phud kyi mchod rten zhes zer ro/ /de'i tshe gtsang ma'i ris kyi lha'i bu dri ma med pa zhes bya ba mngon par sprul pa las ngur smrig blangs te/ rang byung gi bsnyen par