[A:64]las| dang po ni/ de nas byang chub kyi shing gi lha chos sred la sogs pa bzhis chos kyi 'khor lo gang du bskor zhes zhus pa dang / phyogs gang du sangs rgyas stong gis chos gsungs pa dang / gsung bar 'gyur ba'i wA rA Na sIr ro/ /ci'i phyir zhe na/ wA rA Na sI de ni sngon gyi drang srong dam pa rnams kyi gnas/ /sa de lha dang klu yis mngon bstod rtag tu chos ni mngon par gzhol/ /ngas ni sngon chad sangs rgyas bye ba stong phrag dgu bcu rtsa gcig dran/ /de dag drang srong zhes bya nags mchog der ni 'khor lo dam pa bskor/ /zhes gsungs nas thog mar gdul bya dbang po rno ba sngon gyi slob dpon ring 'phur dang lhag spyod la chos bshad par dgongs pa na/ de dag tshe'i dus byas nas zhag gsum dang bdun lon par grags so/ /de nas grong khyer kha lo bsgyur bar gshegs pa'i tshe ganggA la gru btsas 'dod pa la/ med ces gsungs nas nam mkha' la gshegs pa dang | gzugs can snying pos rab tu byung ba la gru btsas mi len par bcas/ de nas thog mar lnga sde la chos bshad par dgongs te/ mthar gyis ma ga dhA nas grong khyer wA rA Na sIr gshegs pa na/ nyer 'gro dang phrad pa la bram ze nyer 'gros| go'u ta ma khyod ni su zhig su la tshangs par spyad/ gang du 'gro zhes dris pa la/ nga la mkhan po slob dpon med/ /nga ni rang byung rdzogs sangs rgyas/ /nga ni 'jig rten dgra bcom pa/ /nga ni ston pa bla med yin/ /lha mir bcas pa'i 'jig rten na/ /nga la do zla yod ma yin/ /sdig pa'i chos las rgyal bas na/ / nyer 'gro nga ni rgyal ba yin/ /nga ni wA rA Na sIr 'gro/ /grong khyer gsal ldan song nas ni/ /long ba lta bu'i sems can la/ /mtshungs pa med pa'i 'od bya'o/ /