[A:84]yod| khyod kyis bud med rab tu 'byin pa'i gsol ba btab pas lnga brgya phrag gcig rtags tsam 'dzin par gyur pa dang /
sru skye rgu'i bdag mo ni bcom ldan 'das kyi yum gyi dod yin pas drin che ba'i phyir ro/
/
bdud kyis mya ngan las 'da' bar gsol ba btab pa na khyod la lan gsum du dris kyang lan ma byung bas 'das pa dang de'i tshe kho bo bdud kyis byin gyis brlabs pas ma thos so/
/
bcom ldan 'das kyis phung po la mkhas pa'i dri ba dris pa na/ khams la mkhas pas lan btab pa dang / na bza' drubs pa na rdog pas brdzis pa dang / zhal skyems pa na chu rnyog ma can drangs pa dang / bslab pa ni phran tshegs la bag yangs byar yod kyis dris shig gsungs pa la ma dris pas da lta rtsod pa dang bcas pa dang / bcom ldan 'das kyi sku gser gyi kha dog lta bu mchi mas dri ma can du byas pa dang / thub pa'i gsang gnas sbubs su nub pa bud med dang spyod pa dman pa la bstan to zhes spyo ba brgyad byas te bskrad pa na/ ma 'gags pas smras pa kun dga' bo med na ji ltar bshad par bya/ 'od srungs kyis smras pa/ yon tan dang ldan mod de dang lhan cig tu mi gnas so/ /de nas 'od srungs kyis khyod dgra bcom pa thob pa na 'dir shog cig ces pa dang / kun dga' bos dge 'dun la phyag btsal te/ yul br-idzi'i grong khyer du song nas dbyar de tshul bzhugs te/ khyim bdag gi bu bzhi rab tu phyung bas dgra bcom pa thob pa dang / de dag gis mkhan po la dgra bcom pa'i skal pa yod par mthong nas/ go'u tam khyod ni bag med ma mdzad par| |shing drung 'thibs po brten nas mya ngan 'da'/ /thugs la bzhag ste bsam gtan mdzod cig dang / /ring por mi thogs zhi ba'i gnas thob 'gyur/ /