[A:85] zhes bskul ba dang / de gsan nas zhag bdun mnyam par bzhag pas dgra bcom pa thob ste nam mkha' la gshegs pa dang 'od srungs la sogs pas bsu ba byas so/ /de nas shing nya gro dha'i phug dben zhing nyams dga' bar/ rgyal po ma skyes dgras sbyin bdag mdzad nas/ 'od srungs la sogs pa'i dgra bcom pa lnga brgya 'tshogs te/ chos gos bzhi brgya dgu bcu rtsa dgu bting ba'i seng ge'i khri la kun dga' bo bzhugs su gsol te/ 'od srungs kyis thal mo sbyar bas/ ston pa 'jig rten phan bzhed pa/ /rgyal bas gsungs pa'i chos rnams kyi/ / rnam pa mchog ni gang bshad pa/ /tshe dang ldan pas mdo sde gsungs/ /zhes gsol ba dang / lha dag gis tshigs su bcad pa/ 'phags pa 'di yang dogs med par/ /seng ge'i sgra bzhin chos kyang 'chad/ /zhi ba'i chos 'di bshad pa la// dad pas chos ni nyan par gyis/ /zhes so/ /de nas kun dga' bos mnyam par bzhag pas thams cad dran par gyur te/ dad pa dang gus pa dang snying rje chen pos sems rtse gcig tu byas te/ 'di skad bdag gis thos pa dus gcig na/ bcom ldan 'das wA rA Na sI drang srong lhung ba ri dwags rgyu ba'i tshal na bzhugs te| zhes pa la sogs pa bden pa bzhi'i chos lan gsum du bzlas te/ tha ma gang las 'phraus nas yul gang du/ gang zag gang la bstan pa thams cad zhal thon du mdzad nas bsdus pa 'od srungs chen pos lung 'di snyed cig ste 'di las lhag pa med do/ /zhes gsungs nas khri las babs pa dang / lhas tshigs su bcad pa/ gang la bdag gis sngon thos pa/ /chos ni thar pa'i bde ba byed/ / 'di skad thos zhes sbyor ba dang / /de yang de ring bsgrags pa yin/ /zhes so/ /