[A:29]thams cad lung chos su 'thad do/ /gsungs pas zhen pa'i brjod bya shog bu la snag tsha'i 'bur du dod pa yi ge'i gzugs su rang mtshan dang dngos kyi brjod bya'i yi ge de 'di 'dra zhig yod ces blo yul du lam gyis dran pa spyi'i mtshan nyid dang | zhen pa'i rjod byed gzugs dang tshor ba dang zhes pas nyan thos pa'i shes pa la grag pa'i sgra rang mtshan dang dngos kyi rjod byed chos 'chad pa'i sgra de 'di 'dra zhig yod ces dran pa spyi mtshan te/ de thams cad lung gi chos yin no/ / bzhi pa dbye ba ni tshul gsum pa'i sgron me'i mdo las/ bka' dang bstan bcos gnyis su chos rnams 'dus/ /legs par gsungs dang de yi dgongs 'grel dang | |de yi dbang gis shAkya'i bstan pa 'di/ /'jig rten khams 'dir yun ring gnas par 'gyur/ /zhes pas bka' dang bstan bcos gnyis las/ dang po la gnyis te/ bka' gsung ba po ston pa'i che ba brjod pa dang / des gsungs pa'i bka'i rang bzhin bshad pa'o/ /dang po ni/ rgya cher rol pa las/ mnyam med mtshungs med nga la su yis bstan/ /chos rnams rang gis rtogs nas rab ston pa/ /de bzhin gshegs pa lha mi'i ston pa yin/ /zhes pas gzhan gyis ma bstan par rang gis ji lta bar rtogs pa ston pa sangs rgyas nyag gcig ste| skabs kyi rgyal ba shAkya thub pa yin la/ de'i rnam par thar pa yang nyan thos dang | theg pa chen po dang / gsang sngags la grags pa du ma yod pa las/ 'dir mdo rgya cher rol pa dang / mngon 'byung dang / mya ngan las 'das pa dang / 'dul ba lung la sogs pa'i rjes su 'brangs te/ theg pa thun mong la grags pa mdo tsam zhig brjod par bya'o/ /de yang lung las/ dang po byang chub mchog tu