[A:110]tshogs pas bskyangs te/ khyim bdag dpal skyes kyi mdo las/ mkhas pa rnams la brten pa chud mi za/ /'phags pa'i tshul gyis legs bshad chud mi za/ / zhes so// //
! gsum pa ji ltar nyan tshul la sbyor dngos rjes las/ sbyor ba gus pa'i spyod lam dang / sems bskyed pa dang / dga' ba sgom pa'o/ /dngos gzhi pha rol tu phyin pa drug ldan du nyan te/ gdan dang me tog 'bul ba dang / sgo gsum sdom pa dang / gnod pa bzod pa dang / nyan pa la spro ba dang / 'chad pa'i sgra la sems rtse gcig pa dang / tshig 'dzin pa'i don dpyod pa'o/ /rjes nongs pa bzod par gsol ba dang / dge ba bsngo ba dang gtang rag gi phyag bya'o/ / gsum pa bshad nyan byas pa'i 'bras bu la gsum ste/ bshad pa'i 'bras bu dang | nyan pa'i 'bras bu dang / des skabs don la sbyar ba'o// //
! dang po la gsum ste/ spyir chos bshad pa'i dang / thar pa cha mthun gyi dang | bye brag tu theg chen gyi chos bshad pa'i phan yon no/ /dang po ni ting ngi 'dzin gyi rgyal po las/ /su dag ser sna med par ni/ /chos kyi sbyin pa mchog sbyin pa/ /de yi phan yon rnam bcu ni/ /'jig rten mgon pos rab tu bshad/ / ces pa dang / mig ldan mar me yod gyur na/ /gzugs rnams mthong ba ji lta bar| |de ni dge dang mi dge'i chos/ /thos pas rnam par shes par 'gyur/ / zhes so// //
! gnyis pa ni byams pa seng ge sgras zhus pa'i mdo las/ stong gsum 'jig rten khams 'di gser dag gis/ /yongs su bkang ste gzhan la byin pa