[A:83]gru gzing/ lha'i rigs kyi blo gros kyi gur 'grel/ man ngag snye ma/ 'grel chen dri med 'od/ mdo bsdus dang po'i 'grel pa a tsa la garbhas mdzad pa/ dbang mdor bstan gyi 'grel pa nA ro pas mdzad pa/ tog bdun 'grel pa slob dpon mi bskyod pas mdzad pa/ dgra nag gi 'grel pa dpal 'dzin gyis mdzad pa/ rdo rje slob dpon gyi las thams cad tshang bar ston pa slob dpon legs sbyin gyis mdzad pa rnams paN chen rin po che'i phyag bris dngos bzhugs pa dad mos kyis nyin mtshan gor ma chag par mig dpe cha dang ma bral bar byas/ skabs 'gar mtshan rang por dpe lta la song/ mar me 'dzin mi phyir thegs pa dang nam langs pa myam du byung ba grangs 'das/ phu phag na phyag dpe po ti nyis brgya tsam/ byams pa gling na pod grangs bzhi brgya kha 'char yod pa'i po ti re re bzhin lan bcu tsam re zhal ma phye ba gcig med/ skye sa/ mkha' spyod rnams kyi phyag dpe kun la yang blta rtog yang dag pa byas/ rje btsun grags pa'i gsung gis/ nga thob rgya can min te/ mthong rgya can yin gsung ba de nyid lag len la bka' ba brdzun med dpang po dang bcas pa yin/ byi lo'i dgun ri bo gser logs kyi ngogs yangs dgon par rje drung du gsung ngag sgrub pa lung sbyin pa'i bar zhib rgyas su smin par byung/ grub pa'i rgyal mo'i tshe dbang dang/ gnas chen chu mig brgya rtsar mi g.yo ba sngon po'i chus bsrungs zhus/ dgon par dbyar gnas la 'ongs/ bde mchog lU dril nag gsum gyi dbang/ lU i smad lnga/ dril bu gzhung gsum/ nag po gzhung drug rnams kyi rgya gzhung so so la bshad pa rgyas par bgyis pa'i skabs/