[A:༡༢༦ན]པའི་མཚན་མ་ཡང་བསྟན། དེ་ལྟར་ངེས་དོན་དུ་མགོན་པོ་འཇམ་པའི་དབྱངས་ཉིད་གནས་ལྔ་རིག་པའི་པཎྜི་ཏའི་ཚུལ་བཟུང་བས་ན་ཆོས་རྗེ་འདིའི་མཁས་པའི་ཡོན་ཏན་ནི་འདིའོ་ཞེས་སོ་སོ་སྐྱེ་བོ་དག་གིས་ནམ་ཡང་བརྗོད་པར་མི་སྤོབས་ལ། བཙུན་པའི་ཡོན་ཏན་ནི་སྡོམ་པ་གསུམ་གྱིས་བསླབ་པ་ལ་ཉེས་པའི་དྲི་ཕྲ་མོས་ཀྱང་མ་གོས་ཤིང་། བཟང་པོའི་ཡོན་ཏན་ནི་བདག་ཉིད་བགྲང་བར་མི་ནུས་པའི་ཡོན་ཏན་ཀུན་གྱི་རྩེར་སོན་ཀྱང་། མངོན་པར་ཁེངས་པའི་དྲི་ཙམ་ཡང་མི་མངའ་བར་ཐུགས་མཆོག་ཏུ་ཞི་བས་གཞན་གྱི་ཁྲོ་བོ་ལ་འདིའི་སྐུ་མཐོང་བ་ཙམ་གྱིས་ཞི་འགྲོ་བ་ཞིག་ཡིན་པར་འདུག་གོ །དེ་ལྟར་མཁས་བཙུན་བཟང་གསུམ་གྱི་ཡོན་ཏན་དང་ལྡན་པའི་བདག་ཉིད་ཆེན་པོ་དེ་ཉིད་ཀྱིས་དགུང་ལོ་བཅུ་གཅིག་ནས་ཞེ་བརྒྱད་ཀྱི་བར་དུ་བསྟན་པ་རིན་པོ་ཆེའི་བྱ་བ་འབའ་ཞིག་མཛད་དེ། ཞེ་དགུ་པ་ཆུ་སྦྲུལ་ཟླ་བ་དྲུག་པའི་ཡར་ཚེས་བཅུའི་ཉིན་གདན་ས་ཆེན་པོའི་བླ་བྲང་རིན་ཆེན་སྒང་དུ་ཞི་བར་གཤེགས་སོ། །དེ་ལ་སློབ་མའི་རྣམ་གྲངས་བགྲང་བར་དཀའ་བ་ཞིག་བྱོན་མོད་ཀྱང་། ཀུན་གྱི་གཙུག་རྒྱན་དམ་པར་གྱུར་པ་ནི་སྔགས་འཆང་ཆོས་ཀྱི་རྒྱལ་པོ་ངག་དབང་ཀུན་དགའ་རིན་ཆེན་བཀྲ་ཤིས་གྲགས་པ་རྒྱལ་མཚན་དཔལ་བཟང་པོ་སྟེ། བསྟན་པའི་ཉི་མ་ཆེན་པོ་དེ་ཉིད་མེ་མོ་གླང་ལོར་བལྟམས། དགུང་ལོ་བཅུ་བདུན་གྱི་བར་དུ་ས་ལོ་ཆེན་པོའི་ཞབས་པད་འབྲལ་མེད་དུ་བསྟེན། གསུང་གི་བདུད་རྩི་ངོམ་པར་གསོལ་ཞིང་བུ་གཅིག་པ་ལྟར་བསྐྱངས། གཞན་ཡང་རྗེ་བཙུན་མཁས་པའི་དབང་པོ་དཀོན་མཆོག་ལྷུན་གྲུབ། འཕགས་ཆེན་དཔལ་ལྡན་