[A:༦༨ན]པའང་མེད་པར་འགྱུར། །ཞེས་དང་། དབུས་མཐའ་ལས། དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་དང་། །ཆོས་ཀྱི་དབྱིངས་ནི་རྣམ་གྲངས་སོ། །གཞན་མིན་ཕྱིན་ཅི་ལོག་པ་ནི། །དེ་འགག་འཕགས་པའི་སྤྱོད་ཡུལ་དང་། །འཕགས་པའི་ཆོས་ཀྱི་རྒྱུ་ཡི་ཕྱིར། །རྣམ་གྲངས་དོན་དེ་གོ་རིམ་བཞིན། །ཞེས་གསུངས་པ་དང་། ཆོས་མངོན་པའི་མཛོད་ལས། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ནི་འགྲོ་ཀུན་གྱིས། །མྱ་ངན་འདས་པ་ཐོབ་པར་འགྱུར། །ཞེས་གསུངས་སོ། །དེ་དག་གི་དོན་ཡང་འདི་ཡིན་ཏེ། དོན་དམ་མཐའ་བཞི་སྤྲོས་པ་བྲལ། །ཀུན་རྫོབ་ཡོད་མེད་ལ་སོགས་པའི། །གཞན་སེལ་ཕན་ཚུན་དངོས་འགལ་གཅོད། །ཡོད་པ་མིན་ལ་མེད་པར་གསུངས། །ཞེས་པའོ། །དེའང་རྣམ་འགྲེལ་ལས། སྒྲུབ་དང་དགག་པ་མ་གཏོགས་པ། །སྒྲ་ལས་བྱུང་བའི་ཐ་སྙད་གཞན། །ཡོད་མིན་དེ་ཕྱིར་མེད་པ་ལ། །མེད་ཕྱིར་འདི་ནི་མི་སྨྲ་ཐོབ། །ཅེས་གསུངས་སོ། །དྲི་བ་གསུམ་པ་འགོག་བདེན་མ་བྱས་པའི་དགེ་བ་ལགས་སམ་ཞེས་པ་ནི། འགོག་བདེན་མ་བྱས་པ་ཡིན་མོད། །དགེ་བ་མཚན་ཉིད་པར་མི་བཞེད་དེ། འཕགས་པ་ཀླུ་སྒྲུབ་ཀྱི་རྩ་ཤེ་ལས། ཅི་སྟེ་ལས་རྣམས་མ་བྱས་ན། །མ་བྱས་པ་དང་འཕྲད་འཇིག་འགྱུར། །ཚངས་སྤྱོད་གནས་པ་མ་ཡིན་པ། །དེ་ལ་སྐྱོན་དུ་ཐལ་བར་འགྱུར། །ཐ་སྙད་ཐམས་ཅད་ཉིད་དང་ཡང་། །འགལ་བར་འགྱུར་ན་ཐེ་ཚོམ་མེད། །བསོད་ནམས་དང་ནི་སྡིག་བྱེད་པའི། །རྣམ་པར་དབྱེ་བའང་འཐད་མི་འགྱུར། །གལ་ཏེ་དེ་ནི་རྣམ་སྨིན་ན། །ཡང་དང་