[A:68a]pa'ang med par 'gyur/ /zhes dang / dbus mtha' las/ de bzhin nyid dang yang dag mtha'/ /mtshan ma med dang don dam dang / /chos kyi dbyings ni rnam grangs so/ /gzhan min phyin ci log pa ni/ /de 'gag 'phags pa'i spyod yul dang / /'phags pa'i chos kyi rgyu yi phyir/ /rnam grangs don de go rim bzhin/ /zhes gsungs pa dang / chos mngon pa'i mdzod las/ thog ma med pa'i dus kyi dbyings/ /chos rnams kun gyi gnas yin te/ /de yod pas ni 'gro kun gyis/ /mya ngan 'das pa thob par 'gyur/ /zhes gsungs so/ /de dag gi don yang 'di yin te/ don dam mtha' bzhi spros pa bral/ /kun rdzob yod med la sogs pa'i/ /gzhan sel phan tshun dngos 'gal gcod/ /yod pa min la med par gsungs/ /zhes pa'o/ /de'ang rnam 'grel las/ sgrub dang dgag pa ma gtogs pa/ /sgra las byung ba'i tha snyad gzhan/ /yod min de phyir med pa la/ /med phyir 'di ni mi smra thob/ /ces gsungs so/ /dri ba gsum pa 'gog bden ma byas pa'i dge ba lags sam zhes pa ni/ 'gog bden ma byas pa yin mod/ /dge ba mtshan nyid par mi bzhed de/ 'phags pa klu sgrub kyi rtsa she las/ ci ste las rnams ma byas na/ /ma byas pa dang 'phrad 'jig 'gyur/ /tshangs spyod gnas pa ma yin pa/ /de la skyon du thal bar 'gyur/ /tha snyad thams cad nyid dang yang / /'gal bar 'gyur na the tshom med/ /bsod nams dang ni sdig byed pa'i/ /rnam par dbye ba'ang 'thad mi 'gyur/ /gal te de ni rnam smin na/ /yang dang