[A:༧༤ན]ཕྱིན་པ་ལ་སོགས་པ་མི་འཐད་པ་བཞིན། མི་བླུན་པོ་ལ་བ་གླང་དུ་འདོགས་པ་ལྟར། དེ་དག་གིས་ལྟ་བའི་སྒོམ་ལ་ཕྱག་རྒྱ་ཆེན་པོར་འདོགས་ན་མིང་ཙམ་ལ་མི་རྩོད། ཕྱག་རྒྱ་ཆེན་པོའི་རང་བཞིན་ནི། །ཕྱག་རྒྱ་ཆེན་པོ་མི་འགྱུར་བདེ། །གཟུང་དང་འཛིན་པ་དབྱིབས་དག་དང་། །རྟོག་དང་བརྗོད་པ་རྣམ་པར་སྤངས། །དྲི་ཟའི་གྲོང་ཁྱེར་ལྟ་བུ་དང་། །པྲ་ཕབ་པ་ཡི་རང་བཞིན་ཅན། །རྣལ་འབྱོར་ཐབས་དང་ཤེས་རབ་བདག །ཨེ་ཝཾ་ཡི་གེ་དེ་ལ་འདུད། །ཕྲ་རབ་རྡུལ་གྱི་ཆོས་ཉིད་འདས། །པྲ་ཕབ་པ་ཡི་རྣམ་པ་ཅན། །རྣམ་པ་ཀུན་གྱི་མཆོག་ལྡན་པ། །ཕྱག་རྒྱ་ཆེན་པོ་དེ་ལ་འདུད། །ཅེས་གསུངས་པ་ལྟར་རྟོགས་བྱ་ཆོས་ཉིད་གཉུག་མ་ཞེས་བྱ་བ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་དོ། །རྟོགས་ཚུལ་སྨྲ་བསམ་བརྗོད་མེད་ཀྱི་ཉམས་པྲ་ཕབ་པའི་རྣམ་པ་ཅན་གྱི་སྒོ་ནས་རྟོགས་བྱའི་ངོ་བོར་རྣལ་འབྱོར་ཟུང་འཇུག་གི་ཡེ་ཤེས། དེ་ཡང་སྣང་སྟོང་ཟུང་འཇུག རིག་སྟོང་ཟུང་འཇུག བདེ་སྟོང་ཟུང་འཇུག བདེ་ཆེན་ཟུང་འཇུག ལྷན་སྐྱེས་ཡེ་ཤེས། རང་བྱུང་ཡེ་ཤེས། རང་རིག་ཡེ་ཤེས། སོ་སོར་རྟོག་པའི་ཡེ་ཤེས་ཞེས་བྱ་བ་ལ་སོགས་པ་མཚན་གྱི་རྣམ་གྲངས་དུ་མ་དང་ལྡན་པ་དེ་རྟོགས་པའི་ཐབས་བཤད་རྒྱུད་རྡོ་རྗེ་ཕྲེང་བ་ལས། བླ་མ་ལེགས་པར་མཉེས་བྱས་ཏེ། །ཡང་དག་དབང་བསྐུར་རབ་མནོས་ནས། །དེ་ཉིད་དོན་ནི་རབ་ཏུ་དབྱེ། །ཞེས་པ་དང་། བརྟག་གཉིས་ལས། ཕྱི་ནས་དེ་ཉིད་རབ་ཏུ་དབྱེ། །ཞེས་གསུངས་པ་ལྟར་སྨིན་བྱེད་ཀྱི་དབང་བསྐུར་མཚན་ཉིད་པ་དང་། གྲོལ་བྱེད་ཀྱི་རིམ་གཉིས་ཡན་ལག་དང་བཅས་པ་ཚུལ་བཞིན་དུ་བསྒོམས་པ་ལས་འབྱུང་བ་ཡིན་