[A:74a]phyin pa la sogs pa mi 'thad pa bzhin/ mi blun po la ba glang du 'dogs pa ltar/ de dag gis lta ba'i sgom la phyag rgya chen por 'dogs na ming tsam la mi rtsod/ phyag rgya chen po'i rang bzhin ni/ /phyag rgya chen po mi 'gyur bde/ /gzung dang 'dzin pa dbyibs dag dang / /rtog dang brjod pa rnam par spangs/ /dri za'i grong khyer lta bu dang / /pra phab pa yi rang bzhin can/ /rnal 'byor thabs dang shes rab bdag /e waM yi ge de la 'dud/ /phra rab rdul gyi chos nyid 'das/ /pra phab pa yi rnam pa can/ /rnam pa kun gyi mchog ldan pa/ /phyag rgya chen po de la 'dud/ /ces gsungs pa ltar rtogs bya chos nyid gnyug ma zhes bya ba rnam pa kun gyi mchog dang ldan pa'i stong pa nyid do/ /rtogs tshul smra bsam brjod med kyi nyams pra phab pa'i rnam pa can gyi sgo nas rtogs bya'i ngo bor rnal 'byor zung 'jug gi ye shes/ de yang snang stong zung 'jug rig stong zung 'jug bde stong zung 'jug bde chen zung 'jug lhan skyes ye shes/ rang byung ye shes/ rang rig ye shes/ so sor rtog pa'i ye shes zhes bya ba la sogs pa mtshan gyi rnam grangs du ma dang ldan pa de rtogs pa'i thabs bshad rgyud rdo rje phreng ba las/ bla ma legs par mnyes byas te/ /yang dag dbang bskur rab mnos nas/ /de nyid don ni rab tu dbye/ /zhes pa dang / brtag gnyis las/ phyi nas de nyid rab tu dbye/ /zhes gsungs pa ltar smin byed kyi dbang bskur mtshan nyid pa dang / grol byed kyi rim gnyis yan lag dang bcas pa tshul bzhin du bsgoms pa las 'byung ba yin