[A:༧༤བ]ཏེ། འཕགས་པ་ཀླུ་སྒྲུབ་ཀྱིས། སངས་རྒྱས་རྣམས་ཀྱི་ཆོས་བསྟན་པ། རིམ་པ་གཉིས་ལ་ཡང་དག་བརྟེན། །གཅིག་ནི་བསྐྱེད་པའི་རིམ་པ་སྟེ། །གཞན་ནི་རྫོགས་པའི་རིམ་པ་ཡིན། །ཞེས་གསང་སྔགས་བླ་མེད་ཀྱི་ཡེ་ཤེས་འདྲེན་པའི་ཐབས་ཐམས་ཅད་རིམ་པ་གཉིས་སུ་བསྡུས་ནས་བཤད་པའི་གནད་ཡིན་ནོ། །ཕྱག་རྒྱ་ཆེན་པོ་ཞེས་བྱ་བའི་སྒྲ་དོན་ནི། ལེགས་སྦྱར་གྱི་སྐད་ལ་མ་སྦྱངས་པ་དག ཕྱག་ནི་སྟོང་པའི་ཡེ་ཤེས་ཏེ། །རྒྱ་ནི་འཁོར་བའི་རྒྱ་ལས་གྲོལ། །ཞེས་གསང་སྙིང་དང་། ཕྱག་རྒྱ་ཆེན་པོ་ཐིག་ལེ་སོགས་ལས་འབྱུང་ཞེས་སྨྲ་བ་ནི་འཁྲུལ་པ་སྟེ། ལེགས་སྦྱར་གྱི་སྐད་ལ་མཧཱ་མུ་དྲ་ཞེས་པ་ནི། བོད་སྐད་དུ་མཧཱ་ཆེན་པོ། མུ་དྲ་རྒྱ་དང་། རྟགས་དང་། མཚན་མ་དང་། གུག་སྐྱེད་ལ་སོགས་པ་ལ་འཇུག་པ་ལས། འདིར་རྒྱ་རུ་བསྒྱུར་བ་ཡིན་ནོ། །དོན་ནི་ཨ་ཝ་དྷཱུ་ཏཱི་པས། རྒྱས་གདབ་ཕྱིར་ན་རྒྱ་ཞེས་ཏེ། །སྲིད་གསུམ་རོ་གཅིག་ཕྱག་ཆེན་པོ། །ཞེས་གསུངས་པ་ལྟར་འཁོར་འདས་ཀྱི་ཆོས་ཐམས་ཅད་བདེ་སྟོང་ཟུང་འཇུག་གི་ངང་དུ་རྒྱས་བཏབ་ནས་ཉམས་སུ་ལེན་པའི་དོན་གྱིས་ལྟ་བ་ཕྱག་རྒྱ་ཆེན་པོ་ཞེས་བྱ་བ་ཡིན་ནོ། །སྐྱེ་ཚུལ་གྱི་རིམ་པ་ནི། གང་ཟག་སྐལ་བཟང་འགའ་ཞིག་ལ་དབང་གི་ཡེ་ཤེས་འབེབས་པའི་དུས་ནས་ཕྱག་རྒྱ་ཆེན་པོའི་ཡེ་ཤེས་མཚན་ཉིད་པ་སྐྱེ་བ་ཡང་ཡོད་མོད། ཕལ་ཆེ་བ་ནི་ཐབས་བསྒོམ་པ་སོགས་ལ་ལྟོས་ཤིང་། ཐོག་མར་ཕྱག་རྒྱ་ཆེན་པོ་ལྟར་སྣང་སྐྱེས་ནས། ཕྱིས་ཕྱག་རྒྱ་ཆེན་པོ་མཚན་ཉིད་པ་སྐྱེ་བར་འགྱུར་བ་ཡིན། ཕྱག་རྒྱ་ཆེན་པོ་ལྟར་སྣང་ཞེས་བྱ་བ་ཡང་ཆ་མཐུན་པ་དུག་ཅན་དང་། འབའ་ཞིག་པ་སྐྱོན་ཅན་གཉིས་འབྱུང་བ་ཡིན། དུག་ཅན་ནི་ཐོས་བསམ་གྱིས་