[A:67a]'gag lhwam 'bob dang bcas pa/ kha ti kha tshang ma yug gnyis/ thon ti kha tshang ma yug gnyis/ gos chen sna lnga yug nyi shu rnams yod/ 'di'i lon la rdor sri mgon dang / dbon jo dar ma gnyis gtang ba yin/ 'brug lo zla ba brgyad pa'i gnam gang la bris zhes pa'i zhu yig dang bcas pa hor gyi gdan 'dren pa rnams slebs pa na/ sku na bgres na'ang sngar bshad pa'i rgyu mtshan rnams dgongs te/ sku srog la yang phongs pa med par byon/ drug cu re gsum la mi nyag gi yul byang ngos su phebs/ de'i tshe mdo khams kyi ston pa blo gros rab gsal zhes bya bas chos kyi dri ba zhus pa la lan 'di ltar gnang nas/ gzhung lugs kyi don gsal bar mdzad de/ dris lan dngos ni/ ston pa blo gros rab gsal gyis/ /dri ba 'dri dar rten bcas pa/ /bdag gi sug par 'phrod gyur bas/ /de la dga' ba rab tu 'phel/ /khyed kyi dri ba dang po rig gter las/ /gang yod de 'jig bum pa bzhin/ /sgra yang yod ces rang bzhin rtags/ /zhes gsungs pa dang / sdom gsum rab dbye las/ chos dbyings yod pa'ang ma yin te/ /yod tsam mi rtag gis khyab par/ /chos kyi grags pas gsal bar gsungs/ /zhes gsungs pa'i don sgra ji bzhin pa lags sam zhes pa ni/ dpal chos kyi grags pas rtog ge pa'i skabs su/ don dam don byed nus pa gang / /de 'dir don dam yod pa ste/ /gzhan ni kun rdzob yod pa yin/ /de dag rang spyi'i mtshan nyid bshad/ /ces don byed nus pa la don dam du yod pa dang / don byed mi nus pa