[A:73a]seng ge sgra'i cho ga mdzad pas/ rgyal po nad las thar bas shin tu dad de theg pa chen po'i sems bskyed la sogs pa zab pa dang rgya che ba'i chos mang du zhus/ mchod gnas rnams kyi phud du bkur/ de nas bzung ste skad rigs mi gcig pa'i gdul bya chos la mi dad pa rnams chos la dad par byas/ dad pa rnams theg pa chen por bcug mdor na gdul bya dpag tu med pa smin cing grol bar mdzad pas bstan pa'i dar rgyas phul du phyin pa mdzad do/ /gzhan yang rgya nag ri bo rtse lngar byon nas/ de na gnas pa'i rtogs ldan rgyan po zhes bya ba la/ bcom ldan 'das kyai rdo rje Dombi lugs kyi dkyil 'khor du mngon par dbang bskur ba sngon du 'gro ba can gyi rje btsun bdag med ma'i sindhu ra'i dkyil 'khor du byin gyis brlabs pa dang / de'i rjes su rdzogs rim zab mo bsam gyis mi khyab pa'i man ngag byin te/ phyag rgya chen po'i ye shes ngo sprod par byed pa'i gdams pa zab mo gnang nas rgyud grol bar mdzad pa yin te/ gdams pa de nyid las/ rje btsun 'jam pa'i dbyangs kyi rnam 'phrul chos rje sa skya paNDi ta chen po rgya nag ri bo rtse ldar phebs nas bzhugs pa'i tshe/ de na sgom chen cig gnas pa'i rtogs ldan rgyan po zhes bya ba zhig gis chos rje pa la bskor ba dang phyag mang po byed cing 'dug pa la/ chos rje pa'i zhal nas/ rtogs ldan pa bskor phyag kyang ngo mtshar che ste/ gnas 'di 'dra na 'dug pa la gdams ngag bzang po la brten pa'i sgom sgrub cig dgos pa yin te ang gsung gi 'dug rtogs ldan pa des bsam mno zhig btang ste rang gi gnas