[A:75b]shes thog mar skyes pa'i tshe na mthong ba'i lam thob pa zhes bya ba yin/ des na rgyun chags su goms shing gong nas gong du bgrod de sa bcu gnyis pa'i bar du phyin pa ni bsgom pa'i lam zhes bya ba yin/ de nas sa bcu gsum mngon du byas pa na sku bzhi ye shes lnga la sogs pa yon tan rgya mtsho lta bu thob pa ni mi slob lam mngon sum du byas pa'o/ /de yang thun mong ba ltar na sbyor lam/ thun mong ma yin pa ltar na phyag rgya chen po dpe'i ye shes mtshan nyid pa rgyud la skyes nas don gyi ye shes mngon du byas pa dang / zung 'jug rdo rje 'chang gi go 'phang tshe 'dir mngon du byed par 'dod na/ rgyud sde nas bshad pa'i spyod pa dang / nye rgyu sogs tshul bzhin du nyams len byas na/ rgya gar gyi grub thob rnams ltar 'dir 'grub pa las 'os ci yong / dpe'i ye shes mtshan nyid pa rgyud la skyes nas spyod pa ma 'grub na 'da' kha ma dang / bar do'i gdams ngag gis 'grub par bshad/ 'ga' zhig gis/ phyag rgya chen po chig chod la/ /sa lam brtsi ba'i rmongs pa 'khrul/ /zhes bya ba ni 'khrul pa ste/ mtshan brjod las/ mgon po sa bcu'i dbang phyug ste/ /zhes bya ba dang / a bhi dha na las/ rab tu dga' dang dri ma med/ /de bzhin 'od byed 'od 'phro dang / /shin tu sbyang dka' mngon du gyur/ /ring du song dang mi g.yo ba/ /legs pa'i blo gros chos kyi sprin/ /dpe med pa dang ye shes che/ /rdo rje 'dzin pa bcu gsum sa/ /zhes sogs rgyud sde dang grub pa'i slob dpon rnams kyis sa lam gyi rnam gzhag rgya cher mdzad pa'i phyir ro/ /mtshan brjod las/ skad cig gcig