[A:76a]gis rdzogs sangs rgyas/ /zhes gsungs pa ni/ sa lam bgrod pa'i tha ma la mngon par rdzogs par 'tshang rgya ba'i tshul yin/ 'da' ka ye shes las/ sems rtog na sangs rgyas yin pas sangs rgyas gzhan du mi 'tshol ba'i 'du shes bsgom par bya'o zhes gsungs pa ni/ sa ra has/ sems nyid gcig pu kun gyi sa bon te/ /gang la srid dang mya ngan 'das 'phro ba/ /'dod pa'i 'bras bu ster bar byed pa yi/ /yid bzhin nor 'dra'i sems la phyag 'tshal lo/ /zhes gsungs pa ltar/ sems kun gzhi'i rnam par shes pa'i kun rdzob dang / don dam pa'i gnas tshul mngon du gyur pa'i sgo nas sa lam bgrod de 'tshang rgya ba la dgongs pa yin/ ji skad du/ rin chen sems las phyir gyur pa'i/ /sangs rgyas med cing sems can med/ /rnam par shes pa'i gnas don nam/ /phyi rol gyur pa yod ma yin/ /zhes pa dang / rnam dag ye shes gzugs can dang / /'khor ba rnam par rtog pa la/ /khyad par cung zad yod ma yin/ /zhes gsungs pa ltar/ 'khor 'das kyi snang ba thams cad sems su ro gcig pa'i gnad kyis yin/ rtogs ldan khyed kyis 'di dag thugs la zhog la sgrub pa mdzod dang phan thogs pa chen po cig 'ong gsungs nas ched gnyer mdzad cing 'dug rtogs ldan rgyan po la gdams pa phyag rgya chen po'i mig thur zhes bya ba chos rje pa'i gsung la yang yang nan chags byas nas bi jis ri bo rtse lngar bris pa'o zhes gsungs so/ /gzhan yang ling chu rtse khab tu bzhugs te chos gsungs pa'i tshe mi mang po zhig ri bo rtse