[A:175b]mtshan/ bla ma mnyam med chen po sogs gus pas bsten nas yab chos rnams la sbyangs pa mthar phyin pa mdzad de/ chos rje'i drung du bsnyen rdzogs kyang bsgrubs nas bstan pa'i bya ba thos bsam sgom gsum dang / mkhas pa'i bya ba 'chad nyan la sogs pa la shin tu brtson par mdzad/ de nas chos rje bla ma gong nas gdan 'dren byung ba'i dus su chos rje sku na bgres pas ma phebs pa la/ slar chos rje'i sgos kyi dbon po zhig 'byon dgos zer byung ba dang / bdag nyid chen po 'dis phebs te mdo khams kyi bar du gdan bteg kyang / rgyal khams kyi bde dog gi dbang gis gong du phebs ma thub par yar byon nas/ gdan sa chen po dang bsam yas su bzhugs nas/ gtso cher chos rje bla ma dam pa'i chag phyi dang / bka' 'bum 'thor ba bsgrigs pa dang / chos rje bde bar gshegs nas gdung gi zhabs tog gsol 'debs/ phyi rten nang rten bzhengs pa la sogs pa'i zhal ta mdzad pa'i ring nas/ bar skabs su gon jo dbon pos gdan drangs nas mdo khams su byon/ chos kyi 'khor lo rgya chen po bskor te thams cad dad par mdzad nas/ slar gdan sa chen po 'di nyid du phebs te shing khang bla brang du sa bzang pa 'phags par grags pas zhu ba po mdzad nas/ chos rje kun bkras pa dang / shar ba sogs dge ba'i bshes gnyen mang po la dpal ldan bla ma dam pa bsod nams rgyal mtshan gyi bka' 'bum gyi thog nas dbang lung man ngag rgyud bshad khrid bka' la sogs pa gsang sngags zab mo'i chos tshul bsam gyis mi khyab pa zhig stsal zhing / gzhan yang mdzad pa rgya