[A:177a]de'i 'gro ba mang po smin grol la bkod cing / de nas nyi ma gnyis tsam gyi bar du dpon slob rnams la lam nor cung zad zhig byung ba'i tshul bstan te/ hor ser yod pa'i sa cha zhig tu phebs pa na/ yul de'i mi rnams kyi cha byad kyang lha 'dre'i cha lugs lta bu yid du mi 'ong pa 'ba' zhig byas pa shin tu 'jigs su rung ba 'ba' zhig 'dug pa gzigs pas slob 'khor rnams cung zad thugs ma bde ba na/ de'i gseb nas hor bod skad cung zad shes pa cig byung nas/ khyed rnams ci 'dra zhig yin zhes 'dri ba la/ rje nyid kyi gsung gis/ gnas sa skya zhes bya ba nas 'ong zhing / rigs 'phags pa'i dpon po yin pa'i tshul gsungs pas/ de ltar yin nges na sngon bla ma 'phags pa bya ba dang nged hor gnyis yon mchod yin zhes zer zhing / bdag nyid chen po la phyag dang bskor ba mang po zhig byas song nas/ de'i nang par hor gyi dpon blon thams cad phyag 'bul zhing byin rlabs zhu ba dang bsnyen bkur rgya chen po 'bul ba la byung ste/ chos kyi sems dang bral zhing sdig pa'i las la dga' ba'i shin tu rtsub sems dang ldan pa rnams kyang gus par gyur to/ de nas kyang rim gyis phebs te grub rdza bya ba'i yul mthon po zhig tu chu gtan nas med par khal ma rnams dang / drung na gnas pa thams cad shin tu skom pas nyen pa na bdag nyid chen po 'dis brag la phur pa btab nas skom sar chu bton te thams cad skom pa'i 'jigs pa las bsgral ba dang / yang skabs shig tu kha ba chen po babs te/ la chen po zhig la lam thams cad kha bas non nas ci bya