[A:196a]mchod gnas mdzad pas rgyal pos kyang tho ling te ho/ ta dben gu shrI'i mtshan dang shel gyi dam kha tho shu dang bcas pa phul/ rgyal po 'khor bcas smin grol la bkod pa sogs bstan 'gro'i don rgya chen po zhig mdzad nas/ dgung lo nyer brgyad pa sa mo phag gi lo rgya yul du bde bar gshegs shing /
ta dben blo gros rgyal mtshan/
de'i gcung ta dben blo gros rgyal mtshan dpal bzang po bya ba ni/ yab ti shrI kun dga' rgyal mtshan gyi btsun mo gnyis pa yul rta ste ra lung ma/ pha ming kun spangs chos grags kyi lcam mo/ ming ma gcig bsod nams dpal bya ba la/ chu pho spre'u lo zla grangs 'ga' zhig gi khyad tsam ma gtogs gcen chos kyi rgyal mtshan 'khrungs pa'i lo de nyid la shal zug tu 'khrungs pa yin te/ bdag nyid chen po 'dis chos rje bla ma dam pa dang / kun mkhyen jo nang pa dang / bu ston kha che/ sa bzang ma ti sogs mkhas grub kyi bshes gnyen khyad par can mang du bsten nas dam pa'i chos spyi dang / bye brag tu yab mes kyi chos thams cad yongs su rdzogs pa gsan nas thugs su chud par mdzad cing / khyad par rgyas pa'i bstan bcos tshad ma rnam 'grel la bdag nyid chen po sa paN dang / 'u yug pa rig pa'i seng ge gnyis kyi 'og nas bla ma 'di las rtsod pa bzang ba ma byung bar grags la/ bla ma 'dis gzhi thog gdan sa mdzad nas lo bco brgyad kyi bar du gdan sa chen po'i tshogs chos gsungs/ de'i ring la ta dben gu shrI'i mtshan dang dam kha phul/ phyis su gong nas gser yig pa mngags nas gdan 'dren byung ba la/ zhing gzhan gyi gdul bya la