[A:212b]bzhi 'khrungs/ de'i nang nas shAkya sengge zhes grags pa des btsun mo gnyis khab tu bzhes pa'i dang po gcung pa dpon mo zhes bya ba la sras mkhas btsun chen po kun dga' bkra shis pa dang / kun dga' rgyal mtshan pa/ gcung kun dga' snying po ste sku mched gsum 'khrungs/ btsun mo gnyis pa ma gcig yum pa zhes bya ba la sras bdag chen rin chen rgyal mtshan dpal bzang po ste gdung sras bzhi tsam byon pa'i nang nas gcen mkhas btsun chen po kun dga' bkra shis rgyal mtshan dpal bzang po zhes bya ba 'di ni gzhon nu nyid nas dam pa'i spyod pa dang ldan zhing / yab chos rnams la gsan pa rgya chen po mdzad cing / khyad par rje btsun sangs rgyas rin chen dang / 'jam dbyangs sa skya lo tsA ba chen po la sogs pa mkhas pa mang po bsten nas dam pa'i chos spyi dang bye brag ma lus pa la gsan pa rgya mtsho'i pha rol du son pa dang / lhag par mus chen sangs rgyas rin chen gyis lugs gnyis kyi sgo nas zhabs tog dbu 'don sogs bla na med pa mdzad cing / rje sangs rin pa nyid dag pa'i zhing du gshegs nas gling dga' bde ba can gyi gdan sa yang mdzad de/ rje 'dis gling dga' bde ba can gyi gnas mchog der gzhi phab nas skal ldan gyi slob ma brgya phrag mang po la gsung ngag rin po che lam 'bras bu dang bcas pa'i gdams pa zab mos thog drangs zab cing rgya che ba'i dam pa'i chos bsam gyis mi khyab pa'i bka' drin stsal/ de'i skabs shig nas rje 'dis bstan pa dang sems can gyi don la dgongs nas hor yul du phebs pas/ lam bar du mi grib can 'ga' zhig gi dbang gis sku