[A:213b]brgyud do/ /zhes pa ltar ro/ /gnyis pa de'i don cung zad phye ba ni/ bdag chen shAkya seng ge'i btsun mo dang po la sras sku mched gsum 'khrungs pa'i bar pa kun dga' rgyal mtshan gyis gling dpon chen gyi sras mo dkar mo'i mtshan dang ldan pa khab tu bzhes pa la sras sku mched gnyis 'khrungs pa'i gcen bdag chen chos kyi rgyal mtshan dpal bzang po ni/ skyes stobs kyi shes rab phun sum tshogs shing / dam pa'i spyod pa dang ldan pa zhig byung yang / dgung lo nyer lnga bzhes pa'i tshe zhi bar gshegs/ de'i gcung 'jam pa'i dbyangs kun dga' blo gros legs pa'i 'byung gnas rgyal mtshan dpal bzang po ni gzhon nu nyid nas rab tu byung zhing / ku sa la'i brtul zhugs la gnas nas gu ru drag po la sogs yi dam gyi lha du ma la grangs dang mtshan ma'i bsnyen pa mthar phyin par mdzad cing / byams dang snying rje'i mnga' bdag gtsang sbra shin tu che ba rgyun du thugs dam 'ba' zhig la bzhugs nas/ mdo khams phyogs kyi rje btsun sa skya pa'i bstan pa'i gsal byed dam pa zhig byung bar grags shing / khyad par bdag chen des rang gi rgyal tshab dam par rje btsun sa skya pa'i gdung brgyud rin po che zhig phebs na khams phyogs kyi sa skya pa'i bstan pa rin po che la phan slebs rgya chen po zhig 'byung ba 'dug snyam du dgongs nas/ bstan pa'i nyi ma sngags 'chang chos kyi rgyal po ngag dbang kun dga' rin chen bkra shis grags pa rgyal mtshan dpal bzang po'i drung du zhu yig rgyas pa 'bul ba rgya chen po dang bcas te sku tshab mi sna cher gtad gnang ste/ de ltar gnang ba'i zhu don gyi snying po