[A:222a]rlabs kyi nus pa shin tu che ba thugs dam la brtson pa'i ring nas gdan sa chen po'i bla brang rin chen sgang du zhi bar gshegs/
nam mkha' legs pa'i rgyal mtshan/
bdag nyid chen po 'di'i gcung ni dbang nam mkha' legs pa'i rgyal mtshan zhes bya ba gzhon nu'i dus su ra khyi phag tu grags pa de nyid de/ 'di ni dbang rnam sras rgyal mtshan gyi btsun mo gnyis pa ma gcig ya 'brog ma bsod nams 'bum bya ba la/ yab dgung lo bzhi bcu pa sa mo yos kyi lor 'khrungs te/ bdag nyid chen po 'di ni skyes stobs kyi thugs rab phun sum tshogs pa dang ldan zhing / gzhon nu nas brtag pa gnyis pa sogs la gsan sbyong mthar phyin mdzad de mkhas grub kyi bla ma mang du bsten/ khyad par stag tshang lo tsA ba shes rab rin chen gyi bsnyen rdzogs kyi mkhan por gyur pa 'brom ston seng ge'i mtshan can la mos gus rtse gcig pa mdzad/ dgung lo bcu drug pa'i dus 'bad rtsol gang yang ma dgos par theg chen chos rje'i sku ring la gong ma ta ming rgyal pos tu kya ho wang gi mtshan dang / gser dam 'ja' sa bod la shes su bcug pa'i lung bzang po gnang sbyin rgya chen po dang bcas pa dang / gzhan yang brgya 'bul yod res kyi 'ja' sa gnang sbyin dang bcas pa byung bar grags/ rdzong lha rtse mnga' zhabs dang bcas pa sogs mchod gzhis kyang shin tu stobs che zhing / ya 'brog him tu chen po/ rin spungs nas nang so nor bu bzang po sogs stobs ldan mang pos bdag nyid chen po 'di'i zhabs pad spyi bo'i gtsug tu blang ste/ bsnyen bkur zhabs tog phun sum tshogs pa bsgrub pa na/ de rnams smin cing