[A:323a]tshogs pa yar ngo'i bsil zer byed ltar 'phel zhing rgyas par gyur cig de dag gis ni dpal sa skya'i gdan sa mdzad pa'i skyes bu ji ltar byon pa'i tshul te skabs su babs pa'i don gzhan bshad pa nyid bstan zin to// //'dir smras pa/ de ltar 'jam pa'i dbyangs nyid 'od gsal gyi/ /lha rigs sprul nas mi yi rje mdzad pa'i/ /mched gsum ma bzang spun bdun la sogs pa/ /lha yi gdung rabs rnams la slar yang 'dud/ /bdud srin ma rig las 'khon grub dbang rje/ /rim gnyis ting 'dzin zas la rtag rol ba'i/ /ljongs 'dir 'khon zhes grags pa gsal ldan pa'i/ /skyes chen rnams kyi yon tan dran pas 'dud/ /rgyal ba'i spyi gzugs rigs gsum mgon po nyid/ /gzhan ngor ngur smrig gos dang gos dkar gyi/ /mdzes skur sprul nas yongs rdzogs bstan pa'i bdag /'gran bral sa skya'i bla chen brgyud bcas rgyal/ /gang gi gdung rigs dri med las byon pa'i/ /gcig min tha dad chos kyi khrir 'khod de/ /rlabs chen bstan 'gro'i don la gcig gzhol ba'i/ /bla brang rnam bzhi'i gdung rabs bsngags par 'os/ /khyad par 'khor ba ji srid gnas kyi bar/ /rgyun mi chad par 'byon pa'i 'phrin las can/ /dus mchod bla brang pa zhes yongs grags pa'i/ /skyes mchog rnams kyi bka' drin dran pas 'dud/ /lhag par snyigs dus dpal ldan sa skya pa'i/ /bstan pa'i me ro rmang nas bslang mdzad de/ /rgyal ba'i bstan la rgyal ba gnyis pa ltar/ /rab grags sngags 'chang kun dga' rin chen rgyal/ /gang