[A:45b]shing / thun mong du sa g.yo ba/ sgra grag pa/ 'od phung 'phro ba la sogs pa snang ngo / /bdun cu pa'i srod la phyi na yod pa 'ga' zhig gis kyang spyan 'dren pa'i lha tshogs du ma mthong zhing / chos rje sa paN drung na 'dug pas kyang gzigs skad/ tho rangs chos rjes cog tsog pur 'dug ste gsol ba btab pas/ cung zad mnal ba na bde ba can nas 'od zer ba'i lha tshogs nam mkha' khyab pa'i gzugs can rin po che'i dra bas bskor ba rnams kyis seng ge'i khri rgyan du mas spras pa dang / mchod pa'i bkod pa du ma dang bcas pas rje pa bde ba can du spyan 'dren zer ba la gsol ba btab pas re zhig cang mi smra bar 'khod par snang ngo / /rje nyid la gsol ba btab pas gshegs pa la spro bar gzigs nas/ khyod kyang bde ba can gyi bkod pa la ltos shig gsungs te phyag gis brda sprad pas/ bai DUrYa'i sa gzhi dang rin po che'i shing ljon pa la sogs pa'i bkod pa yid 'phrog pa gzigs so/ /der dang po gser mdog can du gshegs gsungs pa dang mi 'gal lam zhus pas/ bla ma yab sras kyi drung du skye bar gyur cig ces smon lam gyi stobs las re zhig bde ba can du 'gro gsungs/ de nas rnam thar 'ga' gsung ba sad pa na bsnyel skad/ de'i tshe yan lag bdun pa sngon du 'gro bas dkyil 'khor bsgom pa la sogs pa mdzad nas chos rje pa la/ kho bo re zhig bde ba can du 'gro/ der yun mi ring ba cig bsdad nas gser gyi mdog can du sngar bshad pa'i tshul gyi 'khor los sgyur ba'i cha byad du byas nas sangs rgyas kyi zhing sbyong bar byed/ de nas skye ba gsum pa'i lus de la