[A:46b]nam mkha' ltar yangs pas/ /nges gsang rgyud sde'i don rnams rang dbang 'grel/ /bcu phrag bdun gyi dkyil 'khor lha tshogs dang / /rgyun du dbyer med rol pa'i ting 'dzin can/ /dus mthar bde ba can sogs rim bgrod nas/ /da lta rdo rje 'dzin pa'i sar bzhugs khyed/ /mkhyen brtse nus pa'i rdzu 'phrul bsam yas phyir/ /khyed rigs 'dzin pa'i dad ldan bdag rgyud la/ /lung dang rtogs pa'i yon tan cher bskyed nas/ /sa skya pa yi bstan pa'i rgyun 'di nyid/ /mchog tu 'phel zhing yun du gnas pa yi/ /thogs med nus pa'i dpal la dbang bsgyur mdzod/ /ces dad pa'i rgya mtsho las rang byung du byung ba'i gsol 'debs kyi rba rlabs so/ /de lta bu'i bla ma rje btsun chen po de nyid kyi gcung dpal chen 'od po ni/ yab dgung lo nga dgu pa lcags pho rta lo smin drug zla ba'i nyi shu lnga la 'khrungs te/ de ni thugs brtan zhing yangs la brtson 'grus dang ldan pa/ yab mes kyi chos la sbyangs shing man ngag mang po mnga' ba/ khyad par du gso ba rig pa'i sgo nas brtse ba'i thugs rjes 'gro ba mang po'i don mdzad cing / 'di nyid kyis mdzad pa'i gso ba rig pa la brgyad chung nyi ma'i 'od zer zhes bya ba'i bstan bcos yod par grags la/ dgung lo nga bzhi bzhes pa'i dus su chu mo phag gi lo zla ba lnga pa'i nyi shu gcig la bde bar gshegs so/ /bla ma gcung de la sras gnyis byung ba ni/ ma gcig gar phu ma nyi khri lcam zhes bya ba khab tu bzhes pa las 'khrungs pa yin te/ de yang che ba de chos kyi rje sa skya paNDi ta zhes grags la/ mtshan kun dga' rgyal mtshan zhes bya ba yin