[A:146b-482] mngon par 'du mdzad pas/ rgya lam la 'gro ba rnams kyis kyang chos gsung ba'i sgra rna ba'i dbang por shin tu gsal bar gyur to zhes nges par grags shing/ de'i tshe nam mkha' la me tog gi char chen po mngon par 'bab pa la sogs pa'i ngo mtshar ba'i skyes chen pos tshim par mdzad de/ 'gro ba de rnams thar ba mchog gi sa bon la bkod de 'khor ba mtha' can du mdzad do/ /de nas slar gzims chung nyid du phebs pa'i tshe/ 'o nged rang tshe 'pho khar dwags kong gi yul kla klo phag ltar blun zhing gti mug pa'i rang bzhin can mi dge'i las la ngang gis 'jug pa la mngon par dga' ba de dag gi grong du brgyus shing lus ngag gi sgo nas de rnams la thar pa'i sa bon mang po bzhag pas 'gro ba'i don chen po grub/ da res kyang 'dir 'dus pa'i skye bo 'o skol mthong zhing ngag thos pa de dag la'ang thar pa mchog gi sa bon thebs pas khong rang rnams kyi mdun ma'ang legs pa yin/ da ni kho bo yun ring por mi sdod/ skyes pa thams cad nges par 'ching/ 'dus pa thams cad ni 'bral/ dar ba thams cad ni gud/ brtsigs pa thams cad ni 'jig/ bsags pa thams cad ni 'dzad pa 'jig rten gyi lugs yin pas rang rang gi las kyi lhag ma rnams spyi bor gzung las de nyid sbyong ba'i thabs la 'bad par gyis shig